असे गदिमा आता न होणे...
शुभदा पटवर्धन
दीडशेहून अधिक मराठी आणि पंचवीस हिंदी चित्रपटांचे लेखन, दोन सहस्राहून अधिक चित्रपटगीतं, गीतरामायण, गीतगोपालसारखी महाकाव्यं अशी प्रचंड मोठी साहित्यसंपदा ज्यांच्या नावावर आहे, असे ग. दि. माडगूळकर हे असंच एक व्यक्तिमत्त्व. गदिमांच्या मृत्यूनंतर ३३ वर्षांनी त्यांच्या व्यक्तिमत्त्वाचा वेध घेणारं ‘मंतरलेल्या आठवणी’ हे श्रीधर माडगूळकरांनी लिहिलेलं पुस्तक उत्कर्ष प्रकाशनानं प्रसिद्ध केलं आहे.

काही काही व्यक्तिमत्त्वं अशी असतात की त्यांच्याबद्दल वाचायला, ऐकायला आपल्याला आवडतंच. त्यांच्याबद्दल कितीही वाचलं तरी मनाचं समाधान होतच नाही. त्यामुळेच पुन्हा पुन्हा त्यांच्यावर लेख येत राहतात, पुस्तकं लिहिली जातात. सध्या सांस्कृतिक कार्यक्रमांची चलती आहे, त्यामुळे अशा व्यक्तिविशेष कार्यक्रमांचं तर पेवच फुटलं आहे. अशा विविध माध्यमांतून परत परत त्यांच्या आठवणी जागवत ठेवल्या जातात. ‘मरावे परि कीर्तिरूपी उरावे’ ही म्हण यांच्या बाबतीत अगदी सार्थ ठरते. दीडशेहून अधिक मराठी आणि पंचवीस िहदी चित्रपटांचे लेखन, दोन सहस्रांहून अधिक चित्रपटगीतं, गीतरामायण, गीतगोपालसारखी महाकाव्यं अशी प्रचंड मोठी साहित्यसंपदा ज्यांच्या नावावर आहे, असे ग. दि. माडगूळकर हे असंच एक व्यक्तिमत्त्व.

गदिमांच्या मृत्यूनंतर ३३ वर्षांनी त्यांच्या व्यक्तिमत्त्वाचा वेध घेणारं ‘मंतरलेल्या आठवणी’ हे श्रीधर माडगूळकरांनी लिहिलेलं पुस्तक उत्कर्ष प्रकाशनानं प्रसिद्ध केलं आहे. पुस्तकातील लेख बेळगावच्या तरुण भारतच्या ‘अक्षरयात्रा’ या रविवार पुरवणीत प्रसिद्ध झाले होते आणि तेच आता पुस्तकरूपात संकलित झाले आहेत. याआधी दोनच वर्षांपूर्वी ‘कळशीच्या तीर्थावर’ या नावानं शरतकुमार माडगूळकर यांनीही गदिमांवर पुस्तक लिहिलं होतं.